Euskal Kultura Ondarea zabaltzeko bideo-lehiaketa, Eusko Jaurlaritzako Kultura eta Hizkuntza Politika eta Hezkuntza Sailek antolatua.

Kultura Ondarea giza–adierazpen aipagarrienen multzoa da, gizartearentzat garrantzitsuak, izaera material edo materiagabekoak, belaunaldiz belaunaldi igortzen direnak. Euskal Kultura Ondarea osatzen dute bai elementu materialek (errenazimendu-estiloko dorretu bat, burdinola zahar bat edo alboka bat adibidez), bai materiagabeek (dantza tradizionalak edo bertsolaritza adibidez).

Euskal  Hezkuntza  Sistemako Derrigorrezko Bigarren Hezkuntzako (DBH) hirugarren eta laugarren mailetako, Batxilergoko lehenengo mailako eta Lanbide Heziketako Erdi Mailako Heziketa Zikloetako lehenengo mailako ikasleak, 3 eta 6 partaide arteko taldeetan, eta tutore batek ordezkatuak.

Hiru bideo hoberenek Napolira 7 eguneko bidaia irabaziko dute. Taldekide guztiek tutoreak lagunduta bidaiatzeko aukera izango dute. Napolin dauden bitartean bertako gidari baten laguntza izango dute.

1. Talde bat sortu, zure ikastetxean tutore bat bilatu eta izena eman. 2. Bi bideo grabatu, bat Euskal Kultura Ondarearen elementu bat ezagutzera emateko, eta bestea lehendabizikoaren making-of-ari buruzkoa. Ondoren bi bideoak Youtubeko kanal batera igo 2023ko apirilaren 14a baino lehen.